Ministria e Punëve Publike, Transportit dhe Telekomunikacionit shpall kërkesën për shpronësim
për interes publik të pasurive të paluajtshme pronë private (objekte), që preken nga ndërtimi i
segmentit rrugor "Milot - Rrëshen".
Subjekti kërkues i këtij objekti është Drejtoria e Përgjithshme e Rrugëve. Me anë të këtij publikimi
në shtyp kërkojmë të vëmë në dijeni personat të cilët preken nga ky shpronësim. Vënia në dijeni
konsiston në masën e vlerësimit të llogaritur nga grupi i punës ngritur për këtë qëllim, vlerësim i
cili është miratuar më pas nga Komisioni i Posaçëm i Shpronësimit pranë Ministrisë së Punëve
Publike, Transportit dhe Telekomunikacionit, për pronarët sipas listës emërore bashkëlidhur.
Pronarët që kanë emrat në listën emërore dhe personat e tretë, brenda 15 ditëve nga plotësimi i
këtij afati për publikim, kanë të drejtë të paraqesin pretendimet e tyre, të shoqëruara me dokumentat
përkatëse në Ministrinë kompetente (Ministria e Punëve Publike, Transportit dhe Telekomunikacionit).
Adresa : Sheshi Skenderbe Nr 5, Tiranë, Shqipëri, Tel : +355 4223631
Ju bëjmë me dije që, vlerësimi i objekteve është bërë në bazë të zërave të punimeve të evidentuara
dhe të dokumentuara më pas në proçesverbalët respektive, ndërsa çmimet për çdo zë punimi janë
marrë nga Enti Kombëtar i Banesave, kjo në mbështetje të akteve nënligjore të dala në bazë dhe
për zbatim të ligjit nr.8561, datë 22.12.1999 "Për shpronësimin dhe marrjen në përdorim të përkohshëm
të pasurisë së paluajtshme pronë private, për interes publik".
Vlera totale e këtij shpronësimi është 4 857 712 (katër milion e tetëqind e pesëdhjetë e shtatë
mijë e shtatëqind e dymbëdhjetë) lekë.