Për shqetësimin tuaj kemi pyetur mjeken
gjinekologe, Kozeta Mustafaraj:
“Së pari do sqaroja se kontraceptivët hormonal janë
përbërës steroidë seksualë femërorë të tipit: estrogjen,
progresteron ose vetëm progestativ. Mund të merren
në formën e kontraceptivëve oral, impiante ose me
injektim. Me përdorim më të gjerë janë kontraceptivët
oralë të formave dhe përbërjeve të ndryshme.
Përsa i përket pyetjes se çfarë efekti kanë në
organizëm do shtoja se efekti i tyre është i shumtë.
Së pari ata suprimojnë (frenojnë) ovulacionin apo
pjekjen e vezës dhe ulin transportin e
spermatozoideve në tubat e mitrës. Në të njëjtën kohë
ata japin ndryshime në endometër (shtresën që vesh
mitrën) duke zvogëluar mundësinë e implantimit
(vendosjes) së produktit si dhe trashin mukusin e
qafës së mitrës duke penguar kalimin e
spermatozoitëve.
Së fundi do shtoja se gjatë përdorimit të tyre të mund
të shfaqen të përziera, dhimbje të lehta të gjirit,
dhimbje koke dhe gjakosje në sasi të vogla gjatë
përdorimit. Po ashtu nëse përdoren bashkë me disa
lloj medikamentesh të tjera (për epilepsi apo
tuberkuloz) efekti i tyre ulet. Efekt tjetër anësor është
fakti që përdorimi i tyre mund të vonojë rikthimin e
fertilitetit pas ndërprerjes së tyre, si dhe nuk mbrojnë
nga sëmundjet seksualisht të transmetueshme. Kjo
është arsyeja që gjithmonë rekomandohet konsultë
me mjekun gjinekolog, përpara se të niset përdorimi
i tyre”.
